Мамандардың айтуынша, бүгінде негізгі басымдық – жергілікті табиғатқа бейімделген Шренк шыршасының санын арттыру. Кеген орман шаруашылығы КММ директоры Айболат Сұлтанғазиевтің мәліметінше, қазіргі таңда 154,4 гектар аумаққа 1 069 920 қылқан жапырақты ағаш отырғызылған. Бұдан бөлек, 110 гектар жерге 118 мың көшет егілген.
Мамандар бұл жұмыстардың топырақ эрозиясының алдын алуда маңызды рөл атқаратынын атап өтеді. Орманшылар еңбегі отырғызылған ағаш санымен емес, олардың жерсіну көрсеткішімен бағаланады. Қазіргі таңда бұл көрсеткіш 75–80 пайызға жетіп отыр.
Орманды көбейтудің тағы бір маңызды бағыты – тұқым қорын қалыптастыру. 2021–2025 жылдары орман шаруашылығы мамандары 1400 келіден астам сапалы тұқым жинаған. Соның арқасында сырттан көшет әкелмей-ақ, жергілікті жерде өсірілген материалмен орман алқаптары толықтырылуда.
Бұл жұмыстың негізгі орталығы – дендрарий. Мұнда 3,25 гектар аумақта бірнеше жыл ішінде 2 879 000 көшет өсірілген. Олар Саты ауылы маңындағы орманды қалпына келтіруге және облыстың өзге аймақтарына жіберіледі. Болашақта үш миллионға жуық ағаш табиғи ортаға отырғызылып, өңірдің экологиялық тұрақтылығын арттыруға үлес қоспақ.
Қазіргі таңда жалпы аумағы 89 941 гектарды құрайтын орман шаруашылығында 109 адам еңбек етеді. Сала қажетті техникамен толық қамтылған: 19 жол талғамайтын патрульдік көлік, 62 жылқы, 2 өрт сөндіру көлігі, 3 жүк көлігі, 6 дөңгелекті және 5 шынжыр табанды трактор, сондай-ақ арнайы техника бар.
Соңғы жылдары бұл салаға жас мамандардың келуі де артып келеді. Бұл үрдіске жалақының өсуі мен материалдық-техникалық базаның жаңартылуы оң әсерін тигізуде.
Айта кетейік, аталған жұмыстар Мемлекет басшысы Қасым-Жомарт Тоқаев тапсырған ел аумағында екі миллиард ағаш отырғызу бастамасы аясында жүзеге асырылып отыр. Бұл өз кезегінде өңірдің экологиялық ахуалын жақсартып қана қоймай, экотуризмді дамытуға да серпін береді.
