Шара барысында маңызды мәдени нысанның маңы қоқыстан тазартылып, аумақ көгалдандырылды. Сенбілікке мемлекеттік мекемелер, жеке ұйымдар мен діни бірлестіктердің өкілдері, жастар, волонтерлер, үкіметтік емес ұйымдар және эко-белсенділер қатысты.
Іс-шараға қатысқан Алматы облысы әкімінің орынбасары Ғани Майлыбаев бұл бастаманың маңызын атап өтті.
«Іле өзенінің жағасындағы “Көшпенділер” қалашығы алдағы уақытта ірі туристік нысанға айналады. Сондықтан келушілерге қолайлы орта қалыптастыру үшін бұл жерде экопарк салу жоспарланып отыр. Бұл өңірдің туристік әлеуетіне жаңа серпін береді», – деді ол.
300-ге жуық адам қатысқан сенбілік барысында «Көшпенділер» қалашығының маңына 500 түп ағаш отырғызылып, Іле өзенінің жағалауы тазартылды.
Экологиялық акцияға қатысушылар табиғатты қорғау – әр азаматтың міндеті екенін атап өтті. Қонаев қаласындағы Абай мешітінің наиб имамы Хожанепес Сейітұлы табиғатты аялаудың рухани маңызына тоқталды.
«Ағаш отырғызу – қоршаған ортаға ғана емес, адамзатқа да үлкен пайда әкелетін игі іс. Табиғатты қорғау – баршамызға ортақ міндет», – деді ол.
Облыс әкімдігінің мәліметінше, өңір бойынша өткен сенбілікке 32 мыңға жуық адам қатысып, 225 арнайы техника жұмылдырылған. Нәтижесінде 264 тонна қоқыс шығарылып, 17 800 түп ағаш отырғызылды.
Айта кетейік, Мемлекет басшысы Қасым-Жомарт Тоқаев бастамашы болған «Таза Қазақстан» экологиялық акциясы өңірде қарқынды түрде жалғасып жатыр.
