Полиция мәліметінше, дрондар жол қозғалысы ережелерінің сақталуын бақылауды күшейтіп, құқық бұзушыларды дер кезінде анықтауға мүмкіндік берген. Соның нәтижесінде ауыр жол-көлік оқиғаларының алдын алып, жолдағы қауіпсіздік деңгейін арттыруға ықпал етілген.
Ең жиі тіркелген құқық бұзушылықтардың қатарында қарсы бағыттағы жолаққа шығу, қиылыстардан өту қағидаларын бұзу, жол белгілері мен таңбаларының талаптарын сақтамау, көлікті тоқтату және тұраққа қою ережелерін бұзу бар. Сонымен қатар жаяу жүргіншілер тарапынан да жол жүру қағидаларын бұзу деректері кездескен.
Алматы облысы полиция департаментінің бастығы Мейрам Әбікеев бұл бағыттағы жұмыстардың жалғасатынын айтты.
«Ұшқышсыз ұшу аппараттары жол-көлік оқиғалары жиі болатын учаскелерде құқық бұзушылықтарды анықтауға, объективті бақылауды қамтамасыз етуге және жүргізушілердің қауіпті әрекеттеріне жедел ден қоюға мүмкіндік береді. Басты мақсат жолдардағы қауіпсіздікті қамтамасыз ету, апаттылықтың алдын алу және азаматтардың өмірі мен денсаулығын сақтау», — деді ол.
Аймақта заманауи технологияларды енгізу арқылы жол қозғалысы мәдениетін арттыру және құқық бұзушылықтардың алдын алу бағытындағы жұмыстар алдағы уақытта да жүйелі түрде жалғасады.
