Салтанатты шараға облыс әкімі Марат Сұлтанғазиев қатысып, жаңа қоныс иелерін құттықтады. Аймақ басшысы өз сөзінде тұрғындарды баспанамен қамту мемлекеттік саясаттың басым бағыттарының бірі екенін атап өтті.
«Мемлекет басшысы Қасым-Жомарт Тоқаев халықты баспанамен қамтамасыз ету мәселесін әрдайым негізгі міндеттердің бірі ретінде атап келеді. Осы бағытта өткен жылы 27,5 млрд теңгеге 1700 пәтер сатып алынды. Оның 1500-і әлеуметтік осал топтағы азаматтарға, 200-і жалпы кезекте тұрғандарға берілді. Биыл 42 млрд теңгеге 2361 пәтер сатып алуға ұсыныс беріліп, қаражат бөлінді. Бұл үйлер жыл соңына дейін пайдалануға беріледі», — деді Марат Сұлтанғазиев.
Сондай-ақ өңірде жергілікті бюджет есебінен 80,6 мың шаршы метрді құрайтын 1018 пәтерлі 20 тұрғын үйдің құрылысы жүріп жатыр. Бұл баспаналар жеңілдетілген несие арқылы азаматтарға ұсынылмақ.
Жаңа пәтер иелерінің бірі, көпбалалы ана Мая Оспанова бұл күнді көптен күткенін айтты.
«Бүгін біздің отбасымыз үшін ерекше қуанышты күн. 11 жыл бойы кезекте тұрып, өз үйіміздің кілтін алып отырмыз. Балаларымның кең әрі жайлы үйде өсетініне өте қуаныштымын. Осындай қолдау көрсеткен әкімдікке алғысым шексіз», — деді ол.
Облыс бойынша бүгінде тұрғын үй кезегінде 70 мыңға жуық адам тіркелген. Оның ішінде 21 510 адам әлеуметтік осал топ санатына жатады. Ал Талғар ауданында 14 мыңнан астам тұрғын баспана кезегінде тұрса, олардың 7000-нан астамы әлеуметтік осал топ өкілдері.
Соңғы екі жылда Талғар ауданында 459 пәтер сатып алынып, көпбалалы отбасыларға, балалар үйі түлектеріне және ерекше күтімді қажет ететін азаматтарға кезең-кезеңімен беріліп келеді.
Алматы облысында халықты баспанамен қамту бағытындағы жұмыстар алдағы уақытта да жүйелі түрде жалғасады.
