Тазалық жұмыстары Іле өзенінің бойындағы «Көшпенділер қаласы» мен «Таңбалы тас» шатқалы маңында жүргізілді. Акция барысында аумақ тұрмыстық қалдықтардан тазартылып қана қоймай, жартастарға жазылған бейберекет жазулар да өшірілді.
Іс-шараға 150-ге жуық адам қатысты. Олардың қатарында партия мүшелері, жастар қанатының белсенділері, еріктілер, полиция қызметкерлері және жергілікті тұрғындар бар. Бір күн ішінде 9 тоннадан астам қоқыс жиналып, арнайы полигонға шығарылды.
Алматы облыстық филиалының атқарушы хатшысы Серік Нұрқадыровнің айтуынша, Іле өзенінің бойы – өңірдің көрікті әрі көпшілік жиі баратын орындарының бірі.
«Демалушылар саны артқан сайын қоқыс көлемі де көбейіп, жартастарға ретсіз жазу қалдыру сияқты келеңсіз жағдайлар жиілеп барады. Өткен жылы осы аумақтан 30 тоннадан астам қоқыс шығарылған болатын. Биыл да мәселенің өзекті күйінде қалып отырғанын көріп отырмыз. Сондықтан бұл акцияның басты мақсаты тек тазалық жүргізу емес, қоғамда экологиялық мәдениетті қалыптастыру», – деді ол.
Өз кезегінде облыстық «Жастар Рухы» жастар қанатының төрағасы Әділет Айтқазы өзен жағасында пластик, шыны және тұрмыстық қалдықтардың көп жиналатынын атап өтті. Ал шатқалдағы жартастарда туристер қалдырған жазулар табиғи және тарихи келбетті бұзып отыр.
Ұйымдастырушылардың айтуынша, мұндай жағдайлардың алдын алу үшін туристік аймақтарда санитарлық инфрақұрылымды күшейтіп, қоқыс контейнерлерінің санын арттыру және бақылауды қатаңдату қажет.
