Іс-шараларды қалалық әкімдіктің тұрғын үй-коммуналдық шаруашылық бөлімі ұйымдастырылып жатыр.
Мамандардың мәліметінше, 15 сәуірден 16 сәуірге қараған түні қамыс алқаптары арнайы өңдеуден өтті. Алдағы уақытта бұл жұмыстар қала ішіндегі аумақтарда жалғасады.
Өңдеу кезінде Қазақстанда қолдануға рұқсат етілген, қауіптілігі төмен препараттар пайдаланылады. Олар қоршаған ортаға, адамдар мен жануарларға зиянсыз. Алайда препараттардың өзіндік иісі болғандықтан, тұрғындарға өңдеу жүргізіліп жатқан уақытта терезелер мен есіктерді жауып қою ұсынылады.
«Алдымен су айдындарына жақын аумақтар өңделуде. Одан кейін қала ішіндегі учаскелер қамтылады. Жұмыстар белгіленген кестеге сәйкес жүргізіледі», – деді ТҮКШ бөлімі басшысының міндетін атқарушы Мадияр Зәкеров.
Ресми мәліметке сәйкес, дезинсекция жұмыстары бір апта бойы жүргізіледі және күз айларына дейін бірнеше кезеңмен жалғасады. Сонымен қатар, санитариялық-эпидемиологиялық бақылау басқармасы қыркүйек айына дейін безгек масасына қарсы өңдеуді алты кезең бойынша жүргізуді жоспарлап отыр.
