Бұған дейін жүргізуші куәлігін алуға үміткерлер емтиханды тегін түрде үш рет қана тапсыра алатын.
Жаңа өзгерістер премьер-министрдің орынбасары, цифрлық даму, инновациялар және аэроғарыш өнеркәсібі министрі Жаслан Мәдиевтің төрағалығымен өткен кеңес барысында қарастырылып, бекітілді.
Кеңесте Ішкі істер министрлігімен бірлесіп әзірленген ұсыныстар талқыланған. Олар жүргізуші куәлігін алу үдерісінің ашықтығы мен әділдігін қамтамасыз етуге, азаматтар үшін қолайлылықты арттыруға, сыбайлас жемқорлық тәуекелдерін төмендетуге және жүргізушілерді даярлау сапасын жақсартуға бағытталған.
«Жаңашылдықтарға сәйкес, азаматтар жүргізуші куәлігін алу үшін емтиханды ақылы негізде, емтихандар арасында кемінде 10 күнтізбелік күн үзіліс сақтай отырып, шектеусіз тапсыра алады», – делінген Үкімет хабарламасында.
Жаңа ережелер азаматтарға ыңғайлы жағдай жасауға және емтихан тапсыру процесін жетілдіруге бағытталған.
