Оның айтуынша, қала келбетін жақсарту бағытында жүйелі жұмыстар жүргізілуде. Жүргізілген мониторинг нәтижесінде заңсыз орнатылған жарнамалар анықталып, толықтай демонтаждалған.
Сонымен қатар, дизайн-код талаптарына сәйкес келмейтін нысан иелеріне 36 хабарлама жолданып, оларды қалпына келтіру бойынша міндеттер жүктелген. Бұл жұмыстардың орындалуы тұрақты бақылауда.
Қала аумағында ескірген шағын сәулеттік нысандарды жаңарту, құрылыс аймақтарын уақытша баннерлермен қоршау секілді жұмыстар күнделікті жүргізілуде. Бұдан бөлек, абаттандырылмаған жаяу жүргіншілер жолдары да анықталып, оларды ретке келтіру бойынша арнайы жобалар әзірленіп жатыр.
Алишер Байдуановтың айтуынша, өткен жылы демеушілер есебінен саяжай аумағында, сондай-ақ Абай және Соболев көшелерінде балалар ойын алаңы мен аллея салынған.
«Биыл демеушілер есебінен ғимараттарды жарықтандыру жұмыстары басталды. Қазіргі таңда орталық мешіттің, қала кіреберісіндегі 9 қабатты тұрғын үйдің қасбеттері және стела жарықтандырылды. Алдағы уақытта Алматы көшесінің бойындағы ғимараттарды жарықтандыру жоспарланып отыр», – деді бөлім басшысы.
Қала әкімдігі алдағы уақытта да Қонаевтың сәулеттік келбетін жақсарту және қоғамдық кеңістіктерді дамыту бағытындағы жұмыстарды жалғастыратынын атап өтті.
