Жиналған жұртшылықтың көбі — қарттар, Дінмұхамед Қонаевтың көзін көргендер. Қоғамдық өмірге етене араласатын жастар да іс-шарада бой көрсетті.
Өресі биік өр тұлғаның қалдырған өшпес ізі туралы Қонаев қаласы ардагерлер кеңесінің төрағасы Амангелді Беспаев сөз алып, естеліктермен бөлісті.
«Дінмұхамед Ахметұлы Қонаев Республика партия ұйымын басқарған ширек ғасырда өзінің үлкен мәдениеттілігімен танылып, халық дәстүрін жақсы білетін, тағылымы терең, ой-өресі биік жан екенін көрсетті. Мемлекет ісінен қол үзген кезде де ол елде жүріп жатқан реформа бағыттарын, қоғамды демократияландыру қажет екенін терең түсініп, қолдай білді», — деді Амангелді Беспаев өз сөзінде.
Жиында марқұмның рухына Құран бағышталып, гүл шоқтары қойылды. Сонымен қатар тұрғындар аталған мектепте орналасқан Дінмұхамед Қонаевтың өмірі мен шығармашылық жолы жайлы экспонаттар жиналған көрмені аралауға барды.
