Қазіргі таңда 10 тұрғын үйдің шатыры толық ауыстырылып, заманауи талаптарға сай жаңартылуда. Сонымен қатар, тағы 3 үйде су ағар жүйелерін жөндеу жұмыстары қолға алынған. Бұдан бөлек, 10-нан астам тұрғын үйдің қасбетін сырлау жоспарланған.
Жергілікті билік өкілдерінің айтуынша, бұл жұмыстар қала инфрақұрылымын жақсартуға және тұрғындардың өмір сүру сапасын арттыруға бағытталған. Әсіресе, тозығы жеткен шатырларды жаңарту қауіпсіздік пен жайлылықты қамтамасыз етуде маңызды рөл атқарады.
Қонаев қаласы ТҮКШ бөлімінің басшысы міндетін атқарушы Мадияр Зәкеров аталған жұмыстардың жүйелі түрде жүргізілетінін атап өтті.
«Негізгі мақсат – қала келбетін жақсартып, ескі шатырларды кезең-кезеңімен жаңарту. Өтінімдер пәтер иелері кооперативтері арқылы қабылданып, жоспарға енгізілген», – деді ол.
Айта кетейік, өткен жылы қалада 15 тұрғын үйдің шатыры жаңартылып, тағы 15 үйдің қасбеті сырланған.
