Оның айтуынша, 2025 жылы елімізде қатерлі ісіктен 13 886 адам қайтыс болған.
«Бұл үрдіс сақталып отыр. Жыл сайын елімізде түрлі қатерлі ісік түрлерінен 13–15 мың адам көз жұмады», – деді ол.
Спикердің сөзінше, медицина саласы дамыған сайын ауруды анықтау жиілігі де артып келеді.
«Қазақстанда жыл сайын шамамен 41 мың адамға қатерлі ісік диагнозы қойылады. Бұл дегеніміз – күніне орта есеппен 113 жаңа науқас анықталады деген сөз. Қазіргі таңда онкологиялық аурулар бойынша есепте 234 мың адам тіркелген», – деді Байжүнісов.
Ол бұл көрсеткіштер кең ауқымды скринингтік тексерулер мен ерте диагностиканың нәтижесі екенін атап өтті. Мамандардың айтуынша, қатерлі ісік неғұрлым ерте кезеңде анықталса, науқастардың өмір сүру ұзақтығы мен тірі қалу мүмкіндігі соғұрлым жоғары болады.
«Соңғы жылдары бұл көрсеткіштер жақсарып келеді, және бұл – сөзсіз маңызды жетістік», – деп қорытындылады спикер.
