Өңірлік полиция департаментінің мәліметінше, іс-шараның алғашқы күнінде көші-қон қызметі қызметкерлері 277 құқық бұзушылықты анықтады. Сондай-ақ Қазақстан аумағында болуға рұқсаты жоқ 18 шетелдік азамат қабылдау-тарату орнына орналастырылды.
Көші-қон заңнамасын бұзғаны үшін Қазақстанның 53 азаматы әкімшілік жауапкершілікке тартылды. Олар шетел азаматтарының елде болуына немесе еңбек қызметіне қатысты заң талаптарын бұзған.
Сонымен қатар, сот шешімімен заң талаптарын өрескел бұзған 9 шетелдік азамат Қазақстан аумағынан шығарылды.
Мәселен, Еңбекшіқазақ ауданында жүргізілген тексеру барысында салынып жатқан нысандардың бірінде көрші мемлекеттен келген 12 азаматтың заңсыз жұмыс істеп жүргені анықталған.
Құқық қорғау органдарының мәліметінше, аталған іс-шара «Заң мен тәртіп» қағидаты аясында өткізіліп жатыр. Оның негізгі мақсаты – азаматтардың қауіпсіздігін қамтамасыз ету, олардың құқықтары мен заңды мүдделерін қорғау және құқық бұзушылықтарға мүлдем төзбеушілік қағидатын қалыптастыру.
Полиция өкілдері көші-қон заңнамасын сақтау – тек міндет қана емес, сонымен қатар қоғамдағы тұрақтылықтың маңызды кепілі екенін атап өтті.
