Акцияны Алматы облыстық жастар ресурстық орталығы, білім басқармасы және орман шаруашылығы мекемелері бірлесіп ұйымдастырды.
Іс-шараның негізгі мақсаты – жастардың экологиялық мәдениетін қалыптастыру, табиғатты аялауға және құстарға қамқорлық жасауға баулу. Акция барысында қатысушылар өз қолдарымен жасаған құс ұяларын орнатып, қоршаған ортаға жанашырлық танытты.
Облыстық Жастар ресурстық орталығының директоры Мақсат Кенешовтің айтуынша, мұндай бастамалар жастарды табиғатты қорғауға тәрбиелеуде маңызды рөл атқарады.
«Көктеммен бірге туған өлкеге қайта оралған құстарға қамқорлық көрсету – қоршаған ортаға деген жауапкершіліктің айқын көрінісі. Былтыр бұл ауқымды акция алғаш рет Алматы облысында өтіп, мыңға жуық құс ұясы орнатылған еді. Биыл бұл көрсеткіш одан да жоғары. Акция облыстың барлық аудандары мен қалаларында сәуір айының соңына дейін жалғасады», – деді ол.
Ал Қонаев қаласындағы Шоқан Уәлиханов атындағы №2 гимназияның оқушысы Әлімжан Тұрдалиев табиғатты қорғау әр адамның міндеті екенін атап өтті.
«Қоршаған ортаны қорғау – әр адамның міндеті. Еркіндіктің символына айналған құстарға көмегім тигеніне қуаныштымын», – деді оқушы.
Айта кетейік, аталған акция жастардың экологиялық жауапкершілігін арттырып қана қоймай, табиғатты қорғауға бағытталған игі бастамалардың бірі ретінде өңірде жалғасын табуда.
