Қабылданған заңдағы негізгі өзгерістердің бірі – балалар мен жасөспірімдер спорт мектептерінде (ДЮСШ) әр спортшыға қаржыландыру нормасын енгізу. Бұл жаңашылдық бір спортшыға бөлінетін жыл сайынғы қаржы көлемін орташа 233 мың теңгеден 415 мың теңгеге дейін арттыруға мүмкіндік береді.
Сонымен қатар, құжатта біртұтас оператордың қаржылық есептілігін жыл сайын міндетті аудиттен өткізу қарастырылған. Аталған оператор бюджеттен тыс қаражаттарды спорт және дене шынықтыру саласын дамытуға бағыттайды.
Заң аясында туристік саланы қолдауға да бірқатар өзгерістер енгізілді. Атап айтқанда, туристік өнімдерге қойылатын талаптарды белгілеу және мемлекеттік қолдау шараларын іске асыруда профильдік министрліктің өкілеттігі нақтыланды.
Бұдан бөлек, туристік нысандар мен маршруттарда санитарлық-гигиеналық құралдармен қамтамасыз етуге жұмсалған кәсіпкерлердің шығындарының бір бөлігін субсидиялау тәртібі айқындалды.
Сондай-ақ визит-орталықтар мен туристерді орналастыру орындарын салу және жаңғырту кезінде кәсіпкерлердің шығындарының бір бөлігін өтеу механизмі бекітілді.
Парламент депутаттарының айтуынша, бұл шаралар елдегі туристік инфрақұрылымның сапасын арттыруға, сондай-ақ балаларға арналған спорт нысандарының қолжетімділігін кеңейтуге мүмкіндік береді.
