Дауыстарды санау учаскелік комиссиялар тарапынан ашық және жария түрде, сондай-ақ байқаушылардың қатысуымен жүргізіледі. Бұл рәсім референдумның ашықтығы мен заң талаптарына сәйкес өтуін қамтамасыз етуге бағытталған.
Дауыстарды санау аяқталғаннан кейін әрбір учаскеде дауыс беру нәтижелері туралы арнайы хаттамалар толтырылады. Одан кейін бұл хаттамалар аумақтық референдум комиссияларына жолданады. Сол жерде өңір бойынша референдум нәтижелері жинақталып, қорытындыланады.
Ал республикалық референдумның түпкілікті нәтижелерін Қазақстан Республикасының Орталық референдум комиссиясы жариялайды.
Заңнамаға сәйкес, егер референдумға қатысуға құқығы бар азаматтардың жартысынан көбі дауыс беруге қатысса, референдум өтті деп есептеледі.
Сондай-ақ референдумға шығарылған мәселе бойынша шешім дауыс беруге қатысқан азаматтардың жартысынан көбі қолдап дауыс берген жағдайда қабылданды деп танылады.
