Өңірдегі дауыс беру учаскелерінде негізгі келушілер легі таңертең және түскі уақытта байқалған. Алайда аумақтық, аудандық және облыстық сайлау комиссияларының мүшелері кешкі уақытта да дауыс берушілер саны аз емес екенін айтады. Әсіресе таңертең жұмысқа немесе ауысымға кеткен азаматтар кешкі уақытта учаскелерге келіп, өз таңдауларын жасауда.
«Мен жұмыстан жаңа шықтым. Үйге бара жатқан жолымда дауыс беру учаскесі бар, сондықтан міндетті түрде кіріп, дауыс беруді ойладым. Міне, өз таңдауымды жасадым. Әр адам азаматтық ұстанымын көрсетуі керек. Бұл – біздің ел, біздің Отан, біздің болашағымыз. Егер біз өзіміз қатыспасақ, онда оны біздің орнымызға кім жасайды?» – деді тұрғындардың бірі.
Учаскелер жабылғанға дейінгі уақыт ішінде дауыс беру барысын бақылаушылар да назарда ұстап отыр. Олар дауыс беру үдерісінің ашық әрі ұйымдасқан түрде өтіп жатқанын атап өтуде. Сонымен қатар дауыс беріп шыққан азаматтармен әңгімелесіп, учаскелердегі жағдай туралы пікірлерін білуде.
Бақылаушылардың айтуынша, сайлау учаскелерінде барлық үстелдер белгіленіп, нөмірленген. Бұл сайлаушылардың өз есімдерін тізімнен оңай тауып, дауыс беру рәсімінен тез әрі ыңғайлы өтуіне мүмкіндік береді.
Алматы облысындағы дауыс беру учаскелері кешкі сағат 20:00-де жабылады. Осыдан кейін дауыс санау рәсімі басталады. Жалпы ел бойынша 10 402 референдум учаскесі жұмыс істейді.
