Шара аясында тұрғындар, қалалық мәслихат депутаттары, қоғамдық ұйым өкілдері, жастар мен еріктілер бірігіп, ағаш отырғызды.
Іс-шараның ұраны – «Біз таңдау жасадық — енді бірге болашақты құрамыз». Ұйымдастырушылардың айтуынша, акция референдум күні азаматтық белсенділікті көрсетумен қатар, болашаққа бағытталған символдық бастама болды.
Акцияға Алатау қаласының әкімі Аркен Өтенов қатысып, тұрғындармен, жастармен және еріктілермен әңгімелесті. Оның айтуынша, бұл күн тек маңызды саяси оқиға ғана емес, сонымен қатар болашаққа деген ортақ жауапкершіліктің белгісі.
«Бүгін мемлекетіміз үшін маңызды күн. Референдум — азаматтардың таңдауы. Ал ағаш отырғызу әрбір таңдау болашақ ұрпаққа даму, өсім және игілік әкелуі тиіс екенін білдіреді», – деді қала әкімі.
«Референдум аллеясының» алғашқы көшетін қала әкімі ардагер және мектеп оқушысымен бірге отырғызды. Бұл сәт ұрпақтар сабақтастығы мен ортақ болашақ алдындағы жауапкершіліктің символына айналды.
Аллеяға отырғызылған әрбір ағашқа символдық атаулар берілді. Олардың қатарында Бірлік, Даму, Болашақ, Келісім, Жауапкершілік, Жастар, Жасампаздық, Халықтар достығы, Еңбек және Өркендеу атаулары бар.
Шара соңында қатысушылар жаңа аллея жанында естелікке ортақ суретке түсті. Қала әкімінің айтуынша, мұндай бастамалар экологиялық мәдениетті қалыптастырып, қоғамдық келісімді нығайтуға және қолайлы қалалық орта құруға ықпал етеді.
