Тарихы терең, киелі мекен саналатын Жамбыл ауылы – елге танымал көптеген тұлғаларды түлеткен қасиетті топырақ. Ауылдың рухани мәртебесін айқындайтын орындардың бірі – жыр алыбы Жамбыл Жабаевтың әдеби-мемориалдық мұражайы. Мұнда жыл сайын мыңдаған адам келіп, ұлы ақынның өмірі мен шығармашылығымен танысады. Сондықтан ауыл тұрғындары үшін өткенге тағзым жасап, ұлттық дәстүрге құрмет көрсету – маңызды құндылықтардың бірі.
Референдум күні алғашқылардың бірі болып дауыс беруге келгендердің қатарында Жамбыл Жабаевтың шөбересі, Халық ақыны Әлімқұл Жамбыловтың ұлы Мұратхан Жамбылов та болды. Ол сайлау учаскесіне ұлттық нақыштағы дәстүрлі киіммен келіп, көпшіліктің назарын аударды.
«Мен референдумға мерекеге келгендей әсер алдым. Бұл күн еліміздің тарихындағы маңызды беттердің бірі болып қалатынына сенемін. Біздің жерлестеріміз әрдайым белсенділігімен ерекшеленеді», – деді Мұратхан Жамбылов.
Жамбыл ауылының тұрғындары ел тағдырына бейжай қарамайтынын тағы бір мәрте дәлелдеп, референдум күні бірлік пен азаматтық жауапкершіліктің жарқын үлгісін көрсетті.
