Комитет мәліметінше, отандастарымыз қысқы спорт түрлерінде дәстүрлі түрде жүлде алып жүрген Финляндия мен Бельгия құрамаларын артта қалдырған. Қазақстан құрамасы бұған дейін үздік жиырма елдің қатарына соңғы рет 1994 жылы енген болатын.
Бұл Олимпиадада Қазақстан қоржынына жалғыз алтын медальді мәнерлеп сырғанаушы Михаил Шайдоров салды. Сонымен қатар, өзге спортшылар да жоғары нәтижелер көрсетіп, ұлттық құраманың табысты өнер көрсетуіне үлес қосты.
Атап айтқанда, мәнерлеп сырғанаудан 19 жастағы Софья Самоделкина Олимпиададағы дебютінде 207,46 ұпай жинап, жеке рекордын жаңартып, 10-орын иеленді. Конькимен жүгіруден Надежда Морозова 3000 метр қашықтықта 6-орынға тұрақтаса, Елизавета Голубева 1500 метрде 7-орыннан көрінді.
Шаңғымен тұғырдан секіруде 19 жастағы Илья Мизерных үлкен трамплин бағдарламасында 8-орын алды. Шорт-тректе Денис Никиша 500 метр қашықтықта 7-орынға ие болды. Ал фристайл-могулда Анастасия Городко 8-орын, Павел Колмаков 9-орын көрсеткішіне қол жеткізді.
Спорт комитеті ұлттық құраманың бұл нәтижесі қазақстандық қысқы спорттың дамуындағы маңызды кезеңдердің бірі екенін атап өтті.
