Құжатқа сәйкес, жаңа Конституция референдумда қабылданған жағдайда 2026 жылғы 1 шілдеден бастап күшіне енеді. Мәтінде «егер референдумда мақұлданса, жаңа Конституция қабылданған күн мемлекеттік мереке болып жарияланады» деп көрсетілген.
11 ақпанда Конституциялық комиссия мүшелері Мемлекет басшысы Қасым-Жомарт Тоқаевқа жаңа Конституция жобасы бойынша атқарылған жұмыстың қорытындысын таныстырды. Осыдан кейін Президент конституциялық реформа бойынша республикалық референдум өткізу туралы жарлыққа қол қойды.
Жарлыққа сәйкес, Қазақстанда Конституциялық реформа жөніндегі референдум 15 наурызда, жексенбі күні өтеді.
Анықтамаға сәйкес, референдум азаматтардың маңызды мемлекеттік және саяси мәселелер бойынша тікелей ерік білдіру нысаны. Оның нәтижесінде заңдар қабылданып, Конституцияға өзгерістер енгізілуі мүмкін.
Конституциялық реформа жөніндегі комиссия Президенттің 2026 жылғы 21 қаңтардағы жарлығымен құрылған. Комиссияның негізгі міндеті елдегі саяси және құқықтық жүйені жаңғыртуға бағытталған ұсыныстар әзірлеу.
Бұған дейін Мемлекет басшысы Парламент реформасы аясында Конституцияның шамамен 40 бабына өзгеріс енгізу жоспарланғанын, алайда жұмыс барысында түзетулер саны артуы мүмкін екенін айтқан.
