Мегаполис әуежайларында ірі жобалар басталады
Комитет басшысының айтуынша, елдің ірі авиациялық хабтарында ауқымды инфрақұрылымдық жобалар жүзеге асады. Атап айтқанда, Астана және Шымкент әуежайларында екінші ұшу-қону жолағының құрылысы басталады.
Сонымен қатар Алматы әуежайы ішкі рейстер терминалы қайта жаңғыртылып, Ақтау әуежайы перронына күрделі жөндеу жүргізіледі.
Өңірлерде жаңа әуежайлар ашылады
2026 жылы өңірлік авиацияны дамытуға да ерекше көңіл бөлінеді. Жоспарға сәйкес:
Атырау әуежайы аумағында жаңа терминал салынады;
Павлодар әуежайы аэродромы реконструкцияланады;
Қатон-Қарағай, Зайсан және Кендірлі курорттық аймақтарында жаңа әуежайлар пайдалануға беріледі;
Арқалық әуежайы қайта қалпына келтіріледі.
Бұл жобалар өңірлердің көлік қолжетімділігін арттырып, ішкі туризмнің дамуына серпін бермек.
23 әлеуметтік маңызы бар әуе бағыты субсидияланады
Аймақаралық байланысты күшейту мақсатында 23 әлеуметтік маңызы бар әуе маршрутын субсидиялау бағдарламасы жалғасады. Бұл шалғай өңірлерге әуе қатынасын қолжетімді етуге мүмкіндік береді.
Сонымен қатар әуежайларда Jet A-1 авиаотынын сақтау және құю жүйесі жаңартылып, авиакомпанияларға қызмет көрсетудің сенімділігі артады.
Әуе кемелері көбейіп, халықаралық рейстер кеңейеді
Салтанат Томпиеваның мәліметінше, 2026 жылдың соңына дейін отандық авиакомпаниялар тоғыз жаңа ұшақ сатып алады. Осылайша елдегі әуе кемелерінің жалпы саны 118-ге жетпек.
Халықаралық бағыттар да айтарлықтай кеңейеді. Орталық Азия, ТМД, Таяу Шығыс, Еуропа және Азия елдеріне жаңа рейстер ашылып, қолданыстағы бағыттар бойынша ұшу жиілігі артады. Жоспарланған қалалар қатарында Вена, Токио, Рим, Абу-Даби, Эр-Рияд, Шанхай, Варшава және өзге де ірі мегаполистер бар.
Азаматтық авиация 2050 жылға дейін дамиды
Сондай-ақ салада кадр даярлау жүйесін реформалау, жаңа авиациялық оқу орталығын құру, паспорттық бақылау мен жүк рәсімдеу процестерін цифрландыру көзделіп отыр.
2026 жылы ICAO-мен бірлесіп Қазақстанның азаматтық авиациясын 2050 жылға дейін дамытуға арналған мастер-жоспар әзірлеу аяқталады. Бұл құжат елдің халықаралық авиация жүйесіндегі рөлін күшейтуге бағытталған.
