Мәжіліс депутаты, «AMANAT» партиясы фракциясының мүшесі Мұрат Әбеновтің айтуынша, құжат Парламент қабырғасында екі жылға жуық уақыт бойы талқыланған.
«Бұл – биылғы жылдың ең маңызды заң жобаларының бірі. Себебі ол бүкіл қоғамға тікелей қатысты. Құрылыс кодексі жан-жақты қаралды, мемлекеттік органдармен, түрлі ұйымдармен, қауымдастықтармен және бизнес өкілдерімен кең талқылау жүргізілді. Барлығы 2 200-ден астам ұсыныс түсті. Соның 60–70 пайызы ескеріліп, өзгерістер енгізілді. Ең басты мақсат – заң азаматтардың құқығын қорғауы керек», – деді Мұрат Әбенов.
Депутаттың мәліметінше, Сенат негізгі заң бойынша 27, ілеспе заңдар бойынша 2 ұсыныс енгізген.
«Бұл ұсыныстардың барлығы нақтылау және құжатты жетілдіруге бағытталған», – деді ол.
Нәтижесінде Мәжіліс Құрылыс кодексіне Сенат енгізген түзетулермен келісіп, құжатты қабылдады.
