Облыстық әкімдік мәліметінше, тұрғын үй сатып алу республикалық бюджет және мемлекеттік бағалы қағаздар есебінен жүзеге асырылуда.
Республикалық бюджет есебінен 369 үй алу көзделген. Қазіргі таңда 200 үй сатып алынып, оның 187-сіне төлем жүргізілді. Әлі алынбаған 169 үй Балқаш, Іле, Қарасай, Кеген, Райымбек, Ұйғыр аудандары мен Алатау және Қонаев қалаларында орналасқан.
Мемлекеттік бағалы қағаздар арқылы қосымша 1331 үй сатып алу жоспарланған. Бүгінге дейін 444 үй алынып, 366-сына төлем жасалды. Алынбаған 887 үйдің басым бөлігі Еңбекшіқазақ, Жамбыл, Іле, Талғар аудандарында және Қонаев қаласында тіркелген.
Жыл басынан бері облыс бойынша 644 тұрғын үй сатып алынды. Оның ішінде Еңбекшіқазақ ауданында – 175, Іле ауданында – 132, Жамбыл ауданында – 92, Қарасай ауданында – 75 үй алынған.
Ал қараша айының соңына дейін қосымша 618 үй сатып алу жоспарда тұр. Қазіргі уақытта 345 үй бойынша мемлекеттік сатып алу рәсімдері жүргізіліп жатыр. Желтоқсан айында тағы 438 үй алынады деп күтілуде.
Бұған қоса, Қонаев қаласында 195 үйдің құрылысы толық аяқталып, инженерлік желілер тарту жұмыстары жүргізілуде.
Облыс әкімдігінің мәлімдеуінше, биылғы жоспар толық орындалып, жүздеген отбасының баспана мәселесін шешуге мүмкіндік береді.
