Облыс әкімінің бірінші орынбасары Қанат Есболатов бұрын «Солнышко» балалар лагері орналасқан жерді қарап шықты. Сапар барысында шенеунік жобаға қойылатын негізгі талаптарды айқындап, инфрақұрылымның қолжетімділігі мен сапасының маңызын атап өтті.
Есболатовтың айтуынша, жаңа реабилитациялық орталық өңір үшін әлеуметтік маңызы зор нысан болмақ.
«Бұл орталық – қалпына келуді қажет ететін және тұрақты қолдауға мұқтаж адамдар үшін үлкен тірек болады. Басты міндетіміз – заманауи әрі баршаға қолжетімді инфрақұрылым қалыптастыру», – деді ол.
Жоспар бойынша орталық 100 адамға дейін қабылдай алады. Онда медициналық реабилитация, әлеуметтік-психологиялық көмек, арнайы қызметтер және күндізгі қолдау бағдарламалары ұйымдастырылатын болады.
Әкімдік өкілдері жобалау жұмыстары аяқталғаннан кейін құрылыс кезеңі басталатынын атап өтті.
