Жиында ең алдымен өңірде дағдарыстағы отбасылардың санын азайтуға бағытталған шаралар талқыланды. Сонымен қатар, 2025 жылға арналған өңірлік жұмыспен қамту картасының іске асырылу барысы қаралды.
Мамандардың айтуынша, әлеуметтік қолдауға мұқтаж отбасылардың мәселелерін ерте анықтап, уақытылы көмек көрсету басты міндеттердің бірі.
Комиссия отырысында жұмыс берушілердің міндетті зейнетақы жарналарын уақытылы және толық аудару жайы да назарға алынды. Бұл мәселе өңірдегі еңбек қатынастарының ашықтығы мен әлеуметтік кепілдіктердің сақталуына тікелей ықпал етеді.
Облыс әкімінің бірінші орынбасары әлеуметтік мәселелерге ерекше назар аудару қажеттігін атап өтті.
«Әлеуметтік мәселелер ерекше бақылауды қажет ететін сала. Мәселені тіркеп қою жеткіліксіз. Отбасы дер кезінде қолдау алуы үшін біз нақты әрі жедел әрекет етуіміз керек», – деді Қанат Есболатов.
Отырыс қорытындысы бойынша жауапты бөлімдерге әлеуметтік қолдау шараларын жетілдіру, дағдарыстағы отбасылармен жұмысты күшейту және 2025 жылғы жұмыспен қамту картасын тиімді жүзеге асыру бойынша тапсырмалар берілді.
