Оқиға 16 қараша күні Қарабұлақ ауылында тіркелді. Хабар түсе салысымен оқиға орнына Төтенше жағдайлар департаментінің күші жедел жетті, қосымша резервтік бригадалар да жұмылдырылды.
Құтқарушылардың мәліметінше, өрт 18:18-де толық оқшауланған. Екінші қабаттан екі адам эвакуацияланып, оларға қажетті медициналық көмек көрсетілді. Қайталама қауіптің алдын алу мақсатында үйден 15 газ баллоны шығарылды.
Оқиға орнына алғашқы минуттардан-ақ Талғар ауданының әкімі Танат Айдарбеков келіп, барлық қызметтердің жұмысын үйлестірді.
Үш қабатты ғимаратта 18 пәтер бар, онда шамамен 48 адам тұрады. Әкімдік зардап шеккендерге уақытша баспана ұсынғанымен, тұрғындар туыстарының үйіне орналасты.
Аудан әкімдігінің мәліметінше, таңертеңнен бастап үйдің бүлінген шатырын жөндеу жұмыстары басталады. Қазіргі таңда жаңа БМК нысанының жобасы сараптамадан өтіп жатыр, ал құрылыс жұмыстары келесі жылға жоспарланған.
Қазір жағдай толық тұрақты. Төтенше жағдайлар қызметі аумақты бақылауда ұстап, қауіптің алдын алу шараларын жалғастыруда. Барлық тұрғындардың өмірі мен денсаулығына ешқандай қауіп жоқ.
