Аудан әкімдігінің мәліметінше, Сатай ауылында 900 орындық, ал Ащысай ауылында 600 орындық жаңа мектептердің құрылысы аяқталуға таяу. Қазір нысандарда ішкі әрлеу жұмыстары мен аумақты абаттандыру жүргізіліп жатыр. Негізгі құрылыс кезеңдерінің бәрі толық орындалған.
Жобаның жоспарлауына сәйкес, екі мектеп те жыл соңына дейін пайдалануға беріледі. Осылайша, үшінші тоқсаннан бастап оқушылар заманауи, кең, қолайлы әрі жаңа оқу құралдарымен қамтамасыз етілген ортада білім алуға мүмкіндік алады деп күтілуде.
Биылдың өзінде «Келешек мектебі» бағдарламасы аясында Еңбекшіқазақ ауданында екі мектеп салынған болатын. Бұл ауданның білім беру инфрақұрылымын айтарлықтай жақсартып, үш ауысымда оқитын оқушылар санын азайтуға ықпал етті.
Аудан басшылығының айтуынша, жаңа нысандардың ашылуы өңірдің демографиялық өсімі мен білім беру сапасын арттыруға бағытталған кешенді шаралардың бір бөлігі болып табылады.
