Кездесуде жаңа қаланың сәулет және инфрақұрылымдық шешімдері таныстырылды. Қалалық орта үлгісі, жұмыс орындарын құру, білім беру инфрақұрылымы және болашақ инвестициялық жобалар талқыланды.
Әкімнің айтуынша, жаңа қалаға ерекше мәртебе беру туралы заң жобасы әзірленіп жатыр.
«Көпшілік бұл қаланы “жаңа Дубай”, “жаңа Сингапур” деп атайды. Бірақ бізге өзіндік болмыс қажет. Ол – жай ғана Алатау болуы тиіс. Біздің мақсат – адамдардың “сол қалада өмір сүргім келеді” деген арманы пайда болу», – деді Сұлтанғазиев.
Ол жаңа қала тек тұрғын үй салып қана қоймай, оқу, жұмыс, инновация, мәдениет үшін дамыған ортаға айналуы керек екенін айтты.
«Алматы облысының халқы жыл сайын өсіп келеді. Университеттердің болуы, климаттық жағдай, жастарға арналған мүмкіндіктер – қаланың дамуына ықпал етеді. Жұмыс орындары мен білім беру жүйесін қалыптастыру негізгі мәселе», – деді ол.
Әкімдік дерегінше, жаңа қалада заманауи инфрақұрылым, көлік желісі, әлеуметтік нысандар мен ірі инвестициялық жобалар кезең-кезеңімен іске асырылмақ.
