Биыл аудан шаруалары 2 300 гектар аумаққа картоп егіп, әр гектардан 200–250 центнерден өнім алған. Көрсеткіш интенсивті технологиялар мен заманауи суару жүйелерін қолданудың нәтижесі екені айтылды.
PepsiCo-пен әріптестік аясында кооперативке элиталық тұқымдар беріліп, жаңбырлатып суару жабдығын енгізу қолдау көрсетілген. Жобаның пилоттық бөлігі 150 гектарда іске асқан.
Облыс әкімі Марат Сұлтанғазиевтің айтуынша, корпорациямен байланыс агросалаға жаңа мүмкіндік береді.
«PepsiCo зауытының құрылысы қарқынды жүріп жатыр. Келесі жылдың бірінші тоқсанында іске қосуды жоспарлап отырмыз. Картоп өсірушілермен жұмыс тек Алматы облысында емес, Павлодар мен Ақмола өңірлерінде де жүргізіліп жатыр. Ең бастысы – өнімге кепілді өткізу бар», – деді Сұлтанғазиев.
ӨК төрағасы Дулат Құлмамыров мемлекеттік қолдаудың маңызын атап өтті.
«Жаңбырлатып суару жүйесіне кеткен шығынның 80 пайызы субсидияланды. Бұл шамамен 100 миллион теңге. Біз үшін бұл үлкен қолдау», – деді ол.
Әкімдік өкілдерінің айтуынша, келесі жылы Райымбек ауданында жергілікті тұқым шаруашылығы іске қосылмақ. Жоба отандық картоп сапасын көтеріп, азық-түлік қауіпсіздігін нығайтуға бағытталған.
Сала өкілдері сондай-ақ өнімді сақтау үшін 10 мың тоннаға арналған көкөніс қоймасы қажет екенін айтты. Бұл ұсыныс облыс деңгейінде қаралып жатыр.
Биліктің мәліметінше, PepsiCo-пен әріптестік агробизнеске инвестиция тартуға, экспорт әлеуетін кеңейтуге және өңірлік ауыл шаруашылығының техникалық жаңаруына мүмкіндік береді.
