150 жылдық тарихы бар университет алғаш рет Біріккен Корольдіктің шегінен тыс жерде кампус ашып отыр, және бұл таңдаудың Қазақстанға түсуі елдің ғылыми-инновациялық әлеуеті мен білім беру саласындағы стратегиялық бағытының мойындалуы ретінде бағаланады.
Cardiff University президенті Венди Ларнердің айтуынша, Қазақстанның білім экономикасына бағытталған реформалары мен жастарға арналған қолдауы шешім қабылдауда негізгі фактор болған.
«Біз қазақстандық студенттердің отбасынан жыраққа кетпей-ақ, әлемдік деңгейдегі білім алуына мүмкіндік жасағымыз келеді. Қазақстан – сенімді серіктес әрі ғылыми өсу әлеуеті жоғары ел», – деді ол.
Қазақстандағы Cardiff University кампусы болашақ экономикасының негізгі салалары – жасанды интеллект, биотехнология және медицина бағыты бойынша мамандар даярлауға басымдық береді. Бұл бағыттар Қазақстанның инновациялық даму саясатына сәйкес келеді. Үкімет оқу орнында білім алуға 300 мемлекеттік грант бөлуді ұйғарды. Бұл шешім қазақстандық жастарға британдық үлгідегі жоғары білімге қолжетімділікті арттырады.
Жобаның ғылыми бағытына жетекшілік ету үшін Қазақстанға жасанды интеллект саласының халықаралық деңгейдегі маманы – Cardiff University про-вице-канцлері, Aлан Тьюринг институтының Turing Fellow мүшесі Гэвин Шэддик келді. Ол БҰҰ-ның тұрақты даму мақсаттарына арналған DIMAQ моделін әзірлеу және ДДСҰ-ның жаһандық ауа сапасын бағалау жобаларына жетекшілік етіп келеді.
Cardiff University елімізде білім беру инфрақұрылымын құруды бастап кетті. Қазақстанда AI Learning and Innovation Centre for Excellence орталығы ашылып, жасанды интеллект, деректер ғылымы және нейрожелілер этикасы бойынша оқыту бағдарламалары іске қосылды. Centre «From Zero to Hero» атты ашық курсын ұсынып, кез келген азаматқа цифрлық сауаттылықты бастапқы деңгейден кәсіби деңгейге дейін меңгеруге мүмкіндік беріп отыр.
Университет Қазақстанмен экология және «жасыл» технологиялар саласында да әріптестік орнатуға ниетті. Ауа сапасын бақылау, тұрақты даму көрсеткіштерін зерттеу және экологиялық деректерді цифрландыру бағытындағы жобалар қазіргі кезде пысықталуда.
Cardiff University кампусының ашылуы Қазақстанды Орталық Азиядағы жоғары технологиялық білім беру орталығы ретінде нығайтып қана қоймай, жаңа буын кәсіби кадрларын даярлауға жол ашады. Бұл – ұлттық экономиканың болашағына жасалған маңызды инвестиция, әрі елдің халықаралық академиялық беделін арттыруға ықпал ететін қадам.
