Басқосуда тараптар агроөнеркәсіп кешеніндегі ынтымақтастықтың негізгі бағыттарын талқылады. Әсіресе жылыжай шаруашылығын дамыту, ауыл шаруашылығы дақылдарының жаңа сорттарын енгізу және өнімділікті арттыру мәселелеріне басымдық берілді.
Кездесуде облыс әкімінің орынбасары Ғани Майлыбаев өңірдің аграрлық әлеуеті жоғары екенін атап өтті. Оның айтуынша, Алматы облысы заманауи технологияларды енгізуге және шетелдік әріптестермен бірлескен жобаларды жүзеге асыруға қолайлы өңір болып саналады.
Бүгінде облыста ауыл шаруашылығы қарқынды дамып келеді. Өңірде бидай, арпа, күріш, қарабидай және сұлы сияқты 10-нан астам астық дақылдары, сондай-ақ күнбағыс, соя және сафлор өсіріледі. Сонымен қатар қант қызылшасы, картоп, көкөніс пен жеміс-жидек өндіру көлемі де жылдан-жылға артып келеді. Биылғы жылы егістік алқап 400 мың гектардан асты. Көкөніс пен жеміс-жидектің жалпы өнімі 35 мың тоннаға жетіп, өткен жылмен салыстырғанда 75 пайызға көп болмақ.
Өңірде жылыжай шаруашылығын дамытуға ерекше көңіл бөлінуде. Қазір жалпы аумағы 80 гектарға жуық 50-ге тарта жылыжай кешені жұмыс істейді. Оның ішінде ірі өндірістік жылыжайлармен қатар шағын фермерлік нысандар да бар. Өткен жылы жылыжайларда шамамен 20 мың тонна өнім өндірілсе, биыл бұл көрсеткішті 35 мың тоннаға жеткізу жоспарланып отыр.
Мемлекет тарапынан да ауыл шаруашылығына қолдау күшейіп келеді. Шаруаларға тыңайтқыштардың құнының 60 пайызына дейін, ал тұқым шаруашылығында 70 пайызына дейін субсидия беріледі. Жабық топырақтағы дақылдардың элиталық тұқымдары мен гибридтерінің құнының 20 пайызы, жылыжай салу мен кеңейтуге кеткен шығынның 25 пайызы өтеледі. 2025 жылы осы бағыттарға 2,5 млрд теңгеден астам қаражат бөлінбек.
Кездесу барысында тараптар өзара тәжірибе алмасу, инновациялық технологияларды пайдалану және өнім сапасын арттыру бойынша бірлескен жобаларды талқылады. Корей делегациясы күрделі климаттық жағдайларда тиімді шешімдерін бөлісуге дайын екенін жеткізді.
Кездесу соңында облыс әкімінің орынбасары Ғани Майлыбаев Оңтүстік Кореямен әріптестік байланыстарды кеңейту өңірдің аграрлық саласын дамытуға, экспорттық әлеуетін арттыруға және халықаралық нарыққа шығуға жаңа мүмкіндіктер ашатынын атап өтті.
