Көкөністің орташа өнімділігі гектарына 263 центнерге жетіп, облыс пен Алматы қаласының ішкі сұранысын толық қамтамасыз етті.
Жиналған өнім жергілікті нарықтарда саудаланып қана қоймай, Жетісу және Жамбыл облыстарына да жөнелтілуде. Бұл өз кезегінде аймақаралық азық-түлік айналымын кеңейтіп, фермерлердің табысын арттыруға мүмкіндік беріп отыр.
Бүгінде бірқатар ірі шаруашылықтарда көкөністі қаптау және қайта өңдеу цехтары жұмыс істейді. Бұл өнімнің сапасын сақтауға және оның сақтау мерзімін ұлғайтуға жағдай жасайды.
«Біз Алматы қаласы мен облыстың қажеттілігін толық қамтып отырмыз. Артық өнім өзге өңірлерге жөнелтіліп, фермерлерге қосымша табыс әкелуде», — деді Алматы облысының ауыл шаруашылығы басқармасының басшысы.
Мамандардың айтуынша, ауыл шаруашылығы өнімдерінің осындай өсімі өңірдің азық-түлік қауіпсіздігін нығайтып, ішкі нарықты тұрақты отандық өніммен қамтамасыз етуге сеп болуда.
