2024 жылы бағдарлама аясында жалпы сомасы 2,5 миллиард теңге болатын 271 жоба қаржыландырылды. Ал 2025 жылы дәл осындай көлемде тағы 217 жобаға қолдау көрсетілмек.
Бағдарламаның басты мақсаты – ауыл тұрғындарының табысын арттыру, өзін-өзі жұмыспен қамту деңгейін көтеру және шағын бизнесті дамыту. Ең көп сұранысқа ие бағыттар – мал шаруашылығы, егіншілік және ауыл шаруашылығы кооперативтерін құру.
«Бұл бағдарлама ауыл тұрғындарына өз кәсібін бастауға нақты мүмкіндік беріп отыр. Соның арқасында жаңа отбасылық фермалар мен қайта өңдеу цехтары ашылуда», — деді Алматы облысының ауыл шаруашылығы басқармасының өкілі Ғалым Тоқпейісов.
«Ауыл аманаты» бағдарламасы ауылдық аймақтарда жаңа жұмыс орындарын құрып қана қоймай, өңірлік экономиканы әртараптандыруға және жергілікті өнім өндірушілердің әлеуетін арттыруға жол ашуда.
Алдағы жылдары бағдарлама аясында қолдау тапқан жобалар саны артып, ауыл кәсіпкерлігінің жаңа толқынын қалыптастыру көзделіп отыр.
