Қазіргі таңда филиалдың техника паркі 47 жаңа бірлікпен толықты. Оның ішінде жүк көліктері, тракторлар, тартқыштар, экскаваторлар, мотоциклдер және басқа да жабдықтар бар. Жалпы филиалға барлығы 73 техника бірлігін беру жоспарланған. Ал республика көлемінде «Қазсушар» кәсіпорнының филиалдарына 757 дана жаңа техника жеткізілмек, оның 524-і бүгінде қолданысқа берілді.
Салтанатты рәсім барысында министр Нұржан Нұржігітов су шаруашылығы саласының үздік қызметкерлеріне алғыс хаттар табыстап, олардың еңбегін жоғары бағалады.
«Жаңа әрі заманауи техника филиалдардың жұмыс тиімділігін және қауіпсіздігін арттырады. Министрлік ұсынған жабдықтар мен көліктер қазірдің өзінде гидротехникалық нысандарды жөндеу, салу және тазарту жұмыстарында қолданыс табуда. Біз еңбек жағдайын жақсартуға және су шаруашылығы қызметкерлерінің мәртебесін көтеруге ерекше көңіл бөлеміз. Биыл «Табиғи монополиялар туралы» заңға енгізілген өзгерістердің арқасында су шаруашылығы қызметкерлерінің жалақысы 50 пайызға дейін артты. Сонымен қатар, мамандардың біліктілігін арттыру және қайта даярлау бойынша арнайы бағдарламалар тұрақты түрде өткізіліп келеді», – деді министр.
Су ресурстары және ирригация министрлігінің бұл қадамы суармалы егіншілікті дамыту мен ауыл шаруашылығын тиімді сумен қамтамасыз ету ісінде маңызды рөл атқарады. Заманауи техника мен инфрақұрылымның жаңаруы еліміздің аграрлық әлеуетін арттырып, су ресурстарын ұтымды пайдалануға жол ашады.
