Күзгі каникул 27 қазаннан басталып, 2 қарашаны қоса алғанда аяқталады. Осы кезеңде мектептерде оқу процесі уақытша тоқтатылып, балалардың бос уақытын тиімді өткізуге бағытталған түрлі тәрбиелік және мәдени шаралар ұйымдастырылады.
Министрліктің мәліметінше, оқушылардың демалыс күндері бос уақыттарын мазмұнды өткізу және жеке тұлғалық қасиеттерін дамыту мақсатында «Адал азамат» біртұтас тәрбие бағдарламасы аясында арнайы іс-шаралар жоспары әзірленген. Бағдарлама аясында патриоттық, рухани және экологиялық бағыттағы түрлі кездесулер, шығармашылық байқаулар мен танымдық экскурсиялар өткізілмек.
Білім беру ұйымдарына ұсынылған жоспар оқушылардың рухани-адамгершілік құндылықтарын арттыруға, шығармашылық ойлауын дамытуға және қоғам өміріне белсенді қатысуға ынталандыруға бағытталған.
Айта кетейік, қысқы және көктемгі каникулдар дәстүрлі түрде 10 күнге созылады. Ал бірінші сынып оқушылары үшін қосымша демалыс 9–15 ақпан аралығында белгіленген.
Осылайша, биылғы оқу жылының алғашқы тоқсаны аяқталып, оқушыларға демалып, күш жинауға мүмкіндік берілмек.
