Архитектуралық тұрғыдан ерекше пішінге ие бұл ескерткіште қазақтың қастерлі домбырасы мен пәктік пен сұлулықтың символы саналатын аққу бейнеленген. Ескерткіш ұлы тұлғаның өнер мен ұлттық мәдениетке қосқан баға жетпес үлесін ұлықтауға арналған.
Салтанатты шараға Алматы облысы әкімінің орынбасары Ғани Майлыбаев қатысып, жиналған қауымға облыс әкімі Марат Сұлтанғазиевтің құттықтауын және алғысын жеткізді.
«Нұрғиса Тілендиевтің өнері – ұлттың мәңгілік рухани байлығы. Оның мұрасы – қазақ музыкасының айбары мен елдік рухтың айғағы. Туған жерінде осындай нышанды ескерткіштің бой көтеруі – ұлт тұлғасына деген құрмет пен ұрпаққа үлгі», – делінген әкімнің құттықтауында.
Шараға сондай-ақ ТҮРКСОЙ Жазушылар одағының төрағасы Ұлықбек Есдәулет, облыстық ардагерлер кеңесінің төрағасы Ерболат Тұрымбетов, ауыл тұрғындары мен зиялы қауым өкілдері қатысты. Іс-шара соңында қатысушылар стела орнатылған алаңға ағаштар отырғызып, естелікке суретке түсті.
Айта кетейік, бұған дейін Алматы облысында Нұрғиса Тілендиевтің 100 жылдық мерейтойына орай ескерткіш пен мәдениет үйі ашылған болатын. Сонымен қатар өңірдің өнерпаздары мен қолөнер шеберлері ұлы композитордың құрметіне арналған іс-шаралар аясында Пекин, Бішкек және Мәскеу қалаларында Қазақстан мәдениетін жоғары деңгейде таныстырды.
Жалпы, ЮНЕСКО деңгейінде аталып өтіп жатқан Нұрғиса Тілендиевтің 100 жылдық мерейтойы аясында жыл басынан бері республикалық және халықаралық деңгейдегі мәдени іс-шаралар жүйелі түрде ұйымдастырылып келеді.
Нұрғиса Тілендиевтің өмірі мен шығармашылығы – қазақ музыка өнерінің алтын қорына енген мәңгілік мұра. Оның туындылары ұлттық рух пен елдік санаға серпін беріп, ұрпақ жадында мәңгі сақталады.
