Былтыр жоба аясында 10 нысан абаттандырылып, көгалдандырылған болса, биыл 15 аумақ жаңа келбетке енуде. Олардың қатарында Қонаев, Сейфуллин, Степная көшелерімен қатар №2 және №5 шағынаудандарындағы бірқатар аулалар бар.
Бұл жерлерде заманауи спорт және ойын алаңдары, воркаут аймақтары салынып, жасыл желектер отырғызылуда. Сондай-ақ бұрын жарық жүргізілмеген көшелерде жарықтандыру желілері орнатылмақ.
15 нысанның құрылысы жыл соңына дейін аяқталып, тұрғындардың игілігіне беріледі деп жоспарлануда.
“Бұл жоба жаңа демалыс аймақтарын құру, шаһардың келбетін жақсарту және тұрғындар үшін қолайлы орта қалыптастыруды көздейді. Өтінімдер 1 ақпаннан 1 наурызға дейін қабылданып, тұрғындар ұсынған жобалардың ішінен ең өзектілері іріктелді. Қазір құрылыс жұмыстары кестеге сай жүріп жатыр”, — деді қалалық ТҮКШ және ТҮИ бөлімінің басшысы Тимур Ақмырзаев.
Айта кетейік, бұған дейін де қалада «Халық қатысатын бюджет» жобасы аясында жаңа сквер қолданысқа берілген болатын. Бұл – Қонаев қаласында тұрғындармен өзара ынтымақтастықта жүргізіліп жатқан жұмыстың нәтижелі үлгісі.
