Мерекелік шара алдымен Жамбыл ауылындағы Жамбыл Жабаевтың әдеби-мемориалдық музейінде өтті. Қатысушылар ұлы жыр алыбы Жамбыл Жабаев пен күй атасы Нұрғиса Тілендиевтің рухына тағзым етіп, гүл шоқтарын қойды.
Кейін мерекелік жиын «Көкбастау» атшабарында жалғасты. Мұнда Алматы облысының әкімі Марат Сұлтанғазиев, еңбек ардагері Ә. Абаев, сондай-ақ композитордың қызы Динара Тілендиева құттықтау сөз сөйледі.
Салтанатты шараға мемлекет және қоғам қайраткерлері — ақын және драматург, Қазақстанның еңбек сіңірген қайраткері, Мемлекеттік сыйлықтың лауреаты Нұрлан Оразалин, сондай-ақ әр жылдары Алматы және Жамбыл облыстарының әкімі, ҚР Ауыл шаруашылығы министрі болған Серік Үмбетов қатысты.
Облыс әкімі өз сөзінде Нұрғиса Тілендиевтің ұлттық мәдениетке қосқан өлшеусіз үлесін атап өтті:
«Нұрғиса Тілендиев – халқымыздың рухани қазынасын байытқан дара тұлға. Оның “Отырар сазы” оркестрін құруы – қазақ музыкасының алтын діңгегі. Ал әндері мен күйлері – ұлттың рухани айнасы. Бұл мерейтой тек өнер мерекесі ғана емес, ұлттық рухты жаңғыртқан ерекше сәт», – деді өңір басшысы.
Сонымен қатар, Іле ауданында жаңадан бой көтерген Мәдениет үйі мен орнатылған ескерткіштің де мерейтой шеңберіндегі маңызы ерекше аталды.
Салтанатты бөлімнен кейін Нұрғиса Тілендиев атындағы «Отырар сазы» мемлекеттік академиялық халық аспаптары оркестрі мен Алматы облысының өнерпаздары ұлы сазгердің шығармашылығына арналған музыкалық кеш ұсынды. Кеш барысында «Өз елім», «Аққу», «Махамбет», «Жас қазақ» секілді халық жүрегінен орын алған туындылар орындалды.
«Көкбастау» атшабарында ұйымдастырылған Құнан, Топ және Аламан бәйгелерінде өңірдің жүйріктері сынға түсті. Жарыс жеңімпаздарына автокөліктер мен қомақты қаржылай сыйлықтар табысталды.
Бәйге нәтижелері
Құнан бәйге
? Бойтұмар (Жамбыл обл.) – Chevrolet Cobalt
? Қарагөз – 1 500 000 тг
? Шах – 1 000 000 тг
Топ бәйге
? Қалқаман (Абай обл.) – Changan Uni-Z
? Бірханым – 1 500 000 тг
? Найза – 1 000 000 тг
Аламан бәйге
? Жұмыртұяқ (Жетісу обл.) – Hyundai Tucson
? Сармат – Chevrolet Nexia
? Байқоңыр – 1 500 000 тг
Мерейтойлық шара ұлттық рухты көтерген, өнер мен дәстүрді тоғыстырған үлкен мәдени оқиға ретінде ел жадында қалды.
Ұлы тұлғаның мол мұрасы мен күй әлеміндегі өнегесі келер ұрпаққа шабыт беріп, Нұрғиса Тілендиев есімі қазақ мәдениетінің мәңгілік биігінде жаңғыра беретіні сөзсіз.
