Матч басында жанкүйерлерді елжіреткен тәтті көрініске барлығыңыз куә болған шығарсыздар. Бұл балапандар ешқандайда “дөкейдің” балалары емес, Алматы қаласы Білім басқармасына қарасты №2 арнайы әлеуметтік қызметтерді қажет ететін балаларды қолдау орталығының балалары екен. Олар «Қайрат» пен «Реал» арасындағы матчта футболшылармен бірге алаңға шықты.
Бұл ақпаратты Instagram желісінде блогер Толғанай Сейдахмет жариялады. Ол матчқа қатыспағанымен, кейін интернетте тараған суреттерден балаларды бірден танып, қуанышын көпшілікпен бөліскен.
“Стадионға Кайратпен шыққан кішкентай балалар біз жазда барған Мейірім балалар үйінің балапандары екен ғой. Бәсе түрлері таныс. Қатты қуанып тұрмын, бұл балапандар үшін ерекше сәт қой”, — деп жазды ол өзінің әлеуметтік желідегі парақшасында.
Оның айтуынша, көпшілік Қайрат пен Реалдың матчында алаңға спортшылармен бірге шыққан қай шенеуніктің балалары екен немесе қанша ақша төлеген екен деген пікірлер көп болған. Сондықтан осындай бейнежазба қалдыруды жөн көріпті. Сонымен қатар, балаларға осындай мүмкіндік сыйлаған ұйымдастырушыларға алғысын жеткізді.
Айта кетейік, Толғанай Сейдахмет 23 жастағы жеке кәсіпкер әрі блогер. Ол аталған балаларды қолдау орталығына ерікті ретінде жиі барып тұрады екен. Соңғы рет 2025 жылдың 27 шілдесінде балаларды Алма-Арасанға тауға апарып демалып қайтыпты. Жас блогердің пікірінше, мекемеде өзге ұлттың балалары көп болса да, барлығы дерлік қазақша сайрап тұр.
Еске салсақ, 30 қыркүйек күні Алматыда «Қайрат» – «Реал Мадрид» ойыны өтті. Кездесу қорытындысы 5:0 есебінде Реалдың пайдасына болды.
