Видеода әйел бөгеттен тақтатастар алынып, жеке үй салуға пайдаланылып жатқанын айтып, мұндай әрекеттердің табиғатқа және бөгеттің тұтастығына зиян тигізуі мүмкін екенін ескертіп, биліктен шұғыл араласуды сұраған.
«Қараңыздар, не болып жатыр: бөгеттен тақтатастарды алып, үй салып жатыр. Шұғыл көмек керек! Егер адамдар бөгеттен тастарды ұрлай берсе, бұл бөгетке не болады?», – дейді ол видеода.
Алматы облысы әкімдігі бұл жағдайға дереу назар аударып, 20 қыркүйекте оқиға орнына арнайы комиссия жібергенін мәлімдеді. Тексеру барысында аталған аумақта жергілікті тұрғын өз бетінше «шаруашылық нысаны мен бассейн» сала бастағаны анықталған.
Әкімдік мәліметінше, құрылыс ешқандай рұқсат құжаттарынсыз жүргізілген. Тексеру аяқталғаннан кейін тұрғын архитектуралық-рұқсат құжаттарын алуға өтініш білдіргенімен, әкімдік оның өтінішін қабылдамаған.
Комиссияның шешімі бойынша, нысан иесіне заңсыз құрылысты 12 қазанға дейін толықтай бұзу және бөгеттен алынған темірбетон блоктарын бұрынғы орнына қайтару міндеттелді.
Бұл жағдай жергілікті билік органдарының табиғатты қорғау және инженерлік нысандардың қауіпсіздігін қамтамасыз ету бағытындағы бақылауды күшейту қажеттігін көрсетті. Әкімдік өкілдері заңсыз құрылысқа жол берілмейтінін және мұндай әрекеттерге қатаң шара қолданылатынын атап өтті.
