Спикерлердің айтуынша, өңірдегі мемлекеттік қызметшілерді заманауи цифрлық құралдармен жұмыс істеуге үйрету – цифрлық трансформация жолындағы алғашқы қадамдардың бірі болған. Alatau Hub алаңында қызметкерлерге ChatGPT, Midjourney және өзге де инновациялық сервистердің мүмкіндіктері таныстырылды.
«Біздің басты мақсатымыз – жасанды интеллектті күнделікті жұмыс барысында тиімді қолдану мәдениетін қалыптастыру», – деді Бексұлтан Нұрақын.
Қауіпсіздік және білім беру саласында цифрлық жаңашылдық
Өңірде қауіпсіздік бағытындағы жобалар кешенді түрде жүзеге асырылуда. Бүгінде 9 мыңнан астам бейнебақылау камерасы полиция қызметінің тиімділігін арттырып отыр. Ал мектептер мен балабақшаларда Face ID және QR жүйелері енгізіліп, оқушылар мен тәрбиеленушілердің қауіпсіздігін қамтамасыз етуге мүмкіндік беруде.
Президент Жолдауымен үндес бастама
Мемлекет басшысы Қасым-Жомарт Тоқаев соңғы Жолдауында цифрландыру мен жасанды интеллектті өңірлердің дамуының қозғаушы күші ретінде атап өткен болатын. Алматы облысы бұл бағыттағы тапсырмаларды нақты жүзеге асыруда.
Атап айтқанда, мемлекеттік басқару саласына арналған Qonaev AI жасанды интеллект жүйесі пилоттық режимде іске қосылды. Сонымен қатар, 18 елді мекенде орман өрттерін ерте анықтауға мүмкіндік беретін «ақылды камералар» орнатылып жатыр.
Alatau Hub – цифрлық экожүйенің орталығы
2024 жылы Қонаев қаласында ашылған Alatau Hub қысқа мерзімде өңірдің цифрлық экожүйесінің негізгі орталығына айналды.
2025 жылдың алғашқы жартысында мұнда 900-ден астам іс-шара ұйымдастырылған.
No-code курстарының арқасында 100-ден астам жас маман өздерінің алғашқы цифрлық жобаларын іске асыруға мүмкіндік алды.
Astana Hub резиденттері ауыл шаруашылығына арналған инновациялық шешімдер ұсынуда. Солардың бірі – мал шаруашылығын тиімді басқаруға бағытталған QazTracker жүйесі.
Цифрлық даму – өңірдің болашағы
Алматы облысында жасанды интеллектті енгізу процестерді жылдамдатып, адами фактордан туындайтын қателіктерді азайтуға және ресурстарды үнемдеуге жол ашуда. Осылайша өңір Қазақстандағы цифрлық трансформацияның негізгі драйверлерінің біріне айналып келеді.
Алдағы уақытта бұл бастама тек мемлекеттік басқару саласында ғана емес, экономиканың өзге де маңызды бағыттарында кеңінен қолданылмақ.
