Кәсіпорын директоры Батурин Абдримов жобалардың іске асырылу барысы туралы баяндама жасап, 2021–2025 жылдарға арналған жалпы құны 173,2 млн теңге инвестициялық бағдарлама бекітілгенін жеткізді. Оның ішінде 2024 жылға 39,4 млн теңге қарастырылған.
Бағдарлама аясында Қонаев қаласының 1-ші шағын ауданында ұзындығы 2,5 шақырым болатын төмен қысымды газ тарату желілерінің құрылысы толық аяқталды. Пайдалануға берілген нысан нәтижесінде 2 271 тұтынушы газға қол жеткізді. Оның ішінде 1 680 абонент қазірдің өзінде қосылған.
Биылғы жылы да көгілдір отын жеткізу жұмыстары жалғасуда. Жалпы құны 38,1 млн теңгелік жоба шеңберінде №18 шағын ауданда ұзындығы 2,2 шақырымдық кварталішілік газ тарату желілерінің құрылысы басталды. Жоба аяқталғаннан кейін тағы да 2 мыңнан астам тұтынушы табиғи газға қосылмақ.
Бұл жұмыстар Мемлекет басшысының тапсырмаларын орындауға және тұрғындардың өмір сапасын арттыруға бағытталған өңірлік инфрақұрылымдық бағдарламалардың нақты нәтижесі болып отыр.
