Өңірде 2021–2027 жылдарға арналған кешенді жоспар қабылданып, 23 800 гектар аумаққа 52,6 миллион ағаш отырғызу көзделген. Соңғы төрт жыл ішінде 552,2 гектар жерге 2 миллион 740 мың көшет отырғызылды. Бұдан бөлек, 16 600 гектар аумаққа қара сексеуіл тұқымы себіліп, шығымдылығы 34,5 миллион данаға жетті. Нәтижесінде жоспарланған жұмыстар 100 пайыз орындалды.
Биылғы жоспарға сәйкес 2 430 гектар жер орман екпелерімен толықтырылмақ. Көктемде 80 гектарға 564,7 мың көшет отырғызылса, күзде 2 350 гектар аумаққа 11 750 килограмм қара сексеуіл тұқымын себу жоспарланған. Қазіргі уақытта оның 2 005 гектары дайындалған. Жылдық жоспар толығымен жүзеге асқан жағдайда, облыстағы ормандылық деңгейі 15 пайыздан 15,2 пайызға дейін артады. Салыстырар болсақ, республика бойынша бұл көрсеткіш 5 пайыздан 5,2 пайызға өседі.
Орманды қалпына келтіруге облыстың орман шаруашылығы мекемелері толыққанды отырғызу материалдарымен қамтамасыз етілген. Қазіргі таңда жалпы аумағы 129,9 гектар болатын 2 тұрақты және 10 уақытша тұқымбақ жұмыс істеп тұр. Мұнда 4,7 миллионға жуық қылқан жапырақты және жалпақ жапырақты көшет өсірілуде.
Әрбір егілген ағаш – табиғатқа тағзым, болашаққа аманат. Сондықтан Алматы облысының орманшылары үшін бұл жұмыс – күнделікті міндет қана емес, келер ұрпақ алдындағы зор жауапкершілік.
