Процедураны тәжірибелі дәрігерлер тобы — клиника директорының орынбасары Б.Л. Бертаев пен рентгенолог-дәрігер Е. Дүйсенбекұлы орындады.
Өкпенің трансторакальді трепан-биопсиясы — аз инвазивті әдіс. Ол кеуде қабырғасы арқылы өкпедегі күмәнді түзіліске арнайы ине енгізіп, тін үлгісін алуға мүмкіндік береді. Процедура компьютерлік томография бақылауымен, жергілікті анестезия арқылы жасалады және алынған тіндер микроскопиялық зерттеуден өтеді. Нәтижесінде диагнозды дәл қоюға және емдеу тактикасын дұрыс таңдауға жағдай жасалады.
Алғашқы пациент — Талдыорған қаласының 85 жастағы тұрғыны, ол өкпесіндегі ісікке күдікпен клиникаға жүгінген. 2025 жылдың 27 тамызында оған трансторакальді биопсия жасалды. Қазіргі уақытта науқастың жағдайы қанағаттанарлық, ол үйіне шығаруға дайындалуда.
«Бұл процедураның біздің клиникалық тәжірибемізге енуі — Жетісу облысындағы онкологиялық көмекті дамытудың маңызды қадамы. Енді өңір тұрғындары нақты әрі тиімді диагностикадан өту үшін республикалық орталықтарға бармай-ақ, осында сапалы көмек ала алады. Алдағы уақытта да біз заманауи медициналық технологияларды енгізуді жалғастырамыз. Бұл онкологиялық ауруларды ерте анықтап, уақытылы емдеуге үлкен мүмкіндік береді», — деді Мадияр Аманкелдіұлы.
Бұл бастама өңір халқы үшін қолжетімді әрі сапалы онкологиялық көмектің дамуына жол ашады.
