Жаңа талаптарға сәйкес, ай сайынғы есептер арнайы бекітілген нысан бойынша дайындалып, көпшілікке қолжетімді жерде орналастырылуы, ақпараттық жүйе арқылы жарияланып, ашық сипатта болуы қажет. Есептер үй кеңесімен келісілген соң, МИБ төрағалары немесе басқару субъектілері қол қояды.
Ең басты өзгерістердің бірі – 15 қыркүйектен кейін ай сайынғы есепті ұсыну мерзімі есепті кезеңнен кейінгі айдың 20-сына дейін деп белгіленді.
Сонымен бірге заңнамаға сәйкес, кондоминиум нысанын басқару бойынша жылдық есеп те міндеттелді. Ол үй кеңесінде қаралып, мүлік иелерінің жалпы жиналысында талқыланып, есепті кезеңнен кейінгі жылдың 1 сәуіріне дейін қабылдануы тиіс.
Мүлік иелері есепке қоса банк шотындағы қаражат қозғалысы туралы үзінді көшірмелерді, ақау актілерін, монтаждау және орындалған жұмыстар актілерін, сондай-ақ қаражаттың жұмсалуын растайтын басқа да құжаттарды талап ете алады.
Әрбір пәтер, тұрғын емес үй-жай, автотұрақ орны немесе қойма иесі ағымдағы, жинақтаушы және мақсатты жарналарды төлей отырып, ағымдағы және жинақ шоттарының жай-күйі туралы толық ақпарат алу құқығына ие.
Жаңа ережелерге сәйкес, ай сайынғы және жылдық есептерде кондоминиум нысанын басқаруға жатпайтын қосымша шығыстар да көрсетілуі тиіс. Сондай-ақ жалпы мүлікті жалға беруден түскен кірістер жеке жолмен көрсетілмек.
Бұл өзгерістер тұрғын үй-коммуналдық шаруашылықтағы ашықтықты арттырып, мүлік иелерінің басқару процесіне қатысу мүмкіндігін кеңейтеді деп күтілуде.
