Жергілікті жұрт жолдарды жөндеу, газдандыру, жастарды жұмыспен қамту және ауыл шаруашылығын дамыту сияқты маңызды тақырыптарды көтерді. Кездесу қорытындысында облыс басшысы тиісті басқармаларға нақты тапсырмалар берді.
Сапар барысында Марат Сұлтанғазиев ауданның агроөнеркәсіп кешеніндегі бірқатар ірі нысандарды аралады. Саймасай ауылында ол «Айдарбаев» шаруа қожалығында түйіршіктелген құрама жем өндіретін заманауи желінің іске қосылуымен танысты. Құны 500 миллион теңге болатын жоба сағатына 3,5 тонна өнім шығаруға қауқарлы. Құрылысы 2024 жылдың қазан айында басталып, бүгінде толық аяқталды. Қажетті құжаттар рәсімделіп жатыр. Кәсіпорын 30 адамды тұрақты жұмыспен қамтиды.
Сондай-ақ өңір басшысы «Есік жеміс консерві зауыты» ЖШС-ның өндіріс алаңдарын көрді. Жалпы аумағы 1500 гектарды қамтитын шаруашылықта 200 гектар өрік бағы, 1000 гектар қызанақ алқабы және 300 гектар алма бағы бар. Зауыт қоюлатылған томат пастасын, алма және өрік пюресін, мөлдірленген алма шырынын, сондай-ақ консервіленген өнімдер шығарады. Заманауи «Triowin» және «Manzini» қондырғыларының арқасында тәулігіне 900 тоннаға дейін өнім өндіріледі. Мұнда 100 тұрақты және 200 маусымдық қызметкер еңбек етеді.
Қырбалтабай ауылында орналасқан «Агро Балтабай» ЖШС 12 мың басқа арналған ірі қара бордақылау алаңын дамытып отыр. 2021 жылы құрылған кәсіпорында қазір 1500 бас мал бордақылауда, ал 3000 бас мал жайылымда бағылады. Өндіріс мәрмәр және жартылай мәрмәр сиыр етін шығаруға маманданған. Кәсіпорынның иелігінде 10 мың басқа арналған репродукциялық-бордақылау алаңы, 60 бірлік техника және жеткілікті жем-шөп қоры бар. Мұнда 30 тұрақты қызметкер жұмыс істейді.
Облыс әкімі бұл жобалардың жүзеге асуы өңір экономикасына серпін беріп, ауыл тұрғындарының жұмыспен қамтылуына айтарлықтай үлес қосып отырғанын атап өтті.
