Бағдарламаның орындалуын Алматы облысы Төтенше жағдайлар департаментінің бастығы үйлестіріп, аудан әкімдіктерімен және жергілікті қауымдастықтармен бірлесіп бақылау жүргізуде. Іске белсенді азаматтар мен жергілікті белсенділер де атсалысып отыр.
Жуырда Қазақстан Республикасы Төтенше жағдайлар министрлігінің Өртке қарсы қызмет комитетінің төрағасы Ерлан Төрегелдиев аймаққа арнайы іссапармен келіп, жаңа өрт сөндіру бекеттерінің құрылыс барысы мен материалдық-техникалық жабдықталуын тексерді.
Қазіргі уақытта 10 өрт сөндіру бекетінің құрылысы жүріп жатыр. Олар:
Жамбыл ауданы – Матыбулак, Актерек, Қазыбек бек;
Кеген ауданы – Саты, Ұзынбұлақ;
Қарасай ауданы – Береке;
Балқаш ауданы – Ақкөл;
Ұйғыр ауданы – Шырын;
Еңбекшіқазақ ауданы – Балтабай;
Қонаев қаласы – Шеңгелді.
Мамандардың айтуынша, бұл бекеттер іске қосылған соң, 20 шақырымнан астам қашықтықтағы 54 шалғай ауылда төтенше жағдайларға әрекет ету уақыты айтарлықтай қысқарады. Бұл өз кезегінде аймақтағы мыңдаған тұрғынның қауіпсіздігін қамтамасыз етеді.
«Өрт сөндіру бекеттерінің ашылуы – тек қауіпсіздік деңгейін арттыру ғана емес, сонымен қатар ауылдық аймақтардың инфрақұрылымын дамытудағы маңызды қадам. Біз әрбір тұрғын өзін қауіпсіз сезінуі үшін барлық жағдайды жасауға ниеттіміз», – деді Алматы облысы ТЖД бастығы.
Жаңа нысандар толықтай заманауи құрал-жабдықтармен қамтамасыз етіледі. Мұнда өрт сөндіру техникасы, байланыс құралдары және жеке құрамның күнделікті қызметіне қажетті жағдайлар жасалады.
