Пилоттық кезеңде бұл пән Талғар ауданына қарасты 10 мектеп пен 3 колледжде өткізіледі. Негізгі мақсат- оқушылардың құқықтық санасын қалыптастыру, заңды құрметтеуге тәрбиелеу, сондай-ақ зорлық-зомбылық, буллинг және өзге де құқықбұзушылықтың алдын алу.
Құқықтық мәдениет сабақтарын арнайы дайындықтан өткен, бұған дейін прокуратура және полиция органдарында қызмет атқарған тәлімгерлер жүргізеді. Оларды оқыту 7–8 тамыз күндері басталады.
«Біз құқықтық сананың негізін мектеп қабырғасынан бастап қалаймыз. Тәлімгерлер балаларға өз құқықтары мен міндеттерін түсіндіріп қана қоймай, заңды құрметтеуге, жауапкершілік сезімін қалыптастыруға және сындарлы мінез-құлық дағдыларын дамытуға көмектеседі. Бұл – болашақта орнықты құқықтық мәдениетті қалыптастырудың кілті», – деді ҚР Оқу-ағарту министрлігі Балалардың құқықтарын қорғау комитетінің төрағасы Насымжан Оспанова.
Пилоттық жоба аясында оқу жылында 7–10 сынып оқушылары мен колледж студенттеріне барлығы 36 сабақ өткізу жоспарланған. Сабақтар екі аптада бір рет өтеді. Сонымен қатар алдын ала және қорытынды диагностика жүргізіліп, оқушылардың мінез-құлқына тұрақты мониторинг жасалады.
Сабақтарға арналған әдістемелік материалдарды ҚР Оқу-ағарту министрлігіне қарасты «Өркен» балалардың әл-ауқатын арттыру жөніндегі ұлттық ғылыми-практикалық институты Бас прокуратура жанындағы Құқық қорғау органдары академиясымен бірлесіп әзірледі.
Алдағы уақытта бұл бастама еліміздің өзге өңірлерінде де енгізіліп, кеңейтілетіні жоспарланып отыр.
