Жиында шағын және орта бизнесті дамыту, инвесторлар тарту және кәсіпкерлікті қолдаудың тиімді тетіктері талқыланды.
Әкімнің айтуынша, шағын және орта бизнес – өңір экономикасының негізгі қозғаушы күші. Бүгінде облыста 150 мыңға жуық кәсіпкер жұмыс істейді, бұл өткен жылмен салыстырғанда 7,6%-ға көп. Салада жұмыспен қамтылғандар саны 8,4%-ға өсіп, 261 мың адамға жетті. 2025 жылдың бірінші тоқсанында ШОБ 994,5 млрд теңгенің өнімін өндіріп, бұл көрсеткіш 23,4%-ға артты. Қаңтар–маусым аралығында салық түсімі 34,5%-ға өсіп, 150,6 млрд теңгеге жетті.
Биыл бизнесті қолдауға жергілікті бюджеттен 6,2 млрд теңге бөлінді. Қаражат несие пайыздарын субсидиялауға, қарыздар мен лизингке кепілдік беруге, жас және әлеуметтік кәсіпкерлерге гранттар бөлуге бағытталды. Гранттық бағдарлама аясында 79,9 млн теңгеге 16 жоба, ал «Даму» қоры арқылы 23,7 млрд теңгеге 119 жоба іске асырылуда.
«Атамекен» ҰКП басқарма төрағасы Райымбек Баталов облыстың кәсіпкерлікті дамытудағы және инвесторлар үшін қолайлы ахуал қалыптастырудағы оң қарқынын атап өтті. Ол мемлекет пен бизнестің серіктестігі айтарлықтай экономикалық серпін беретінін және қолдау бағдарламалары кәсіпкерлерге нарықтағы орнын сақтап қана қоймай, өндірісін ұлғайтуға, жаңа нарықтарға шығуға және жұмыс орындарын ашуға мүмкіндік беретінін айтты. Сондай-ақ, «Атамекен» өңір билігімен әріптестікті жалғастырып, бизнестің өзекті мәселелерін шешуге атсалысатынын жеткізді.
Соңғы үш жылда облысқа тартылған инвестиция көлемі 60%-ға өсіп, 2,4 трлн теңгеге жетті. Жаңа-Алатау ауданында 96,5 мың гектар аумақта салықтық жеңілдіктер мен преференциялар ұсынылатын арнайы экономикалық аймақ құрылды. Қазір өңірде жалпы аумағы 2 119,3 гектар болатын алты индустриялық аймақ жұмыс істеп тұр, тағы тоғызын ашу жоспарланған, оның жетеуі БАКАД бойында орналасады.
Өңірдің инвестициялық портфелінде құны 6,3 трлн теңге болатын 229 жоба бар. Олардың ішінде «Almaty Insulation» жылу оқшаулағыш материалдар зауыты, «Шин-Лайн» балмұздақ фабрикасы, Focus Logistics логистикалық хабы, KT&G кәсіпорны және «Оспанов Девелопмент» балық шаруашылығы сияқты ірі нысандар бар. 2025 жылы 302,7 млрд теңгеге 35 жобаны іске қосу көзделіп отыр.
Жыл басынан бері инвесторлармен 242 кездесу өткізілді, олардың 80%-ы Қытай өкілдерімен. Соңғы үш жылда өңірге 1,8 млрд АҚШ долларынан астам тікелей шетелдік инвестиция тартылды.
“Біз әрбір инвестор мен кәсіпкер өз жобасының барлық кезеңінде жан-жақты қолдауды сезінуі үшін бар жағдайды жасаймыз. Бизнес дамыса, өңірдің экономикасы да өркендейді”, — деді Марат Сұлтанғазиев.
