Бұл көрсеткішпен өңір құрылыс көлемі бойынша республикадағы үздік үштікке енді. Құрылыс қарқыны тұрақты түрде өсіп, әлеуметтік маңызы зор жобалар жүйелі жүзеге асырылып келеді.
Тұрғын үй саясатының табысты жүзеге асып жатқанын көрсететін айқын мысал — Ұйғыр ауданының Шонжы ауылында көпқабатты тұрғын үйдің құрылысы аяқталып, пайдалануға берілуі. Аталған нысан 2022 жылы салына бастаған болатын, ал 2025 жылы толықтай аяқталып, пайдалануға берілді.
Алматы облысының әкімі Марат Сұлтанғазиев жұмыс сапары барысында жаңа қоныс иелеріне пәтер кілттерін салтанатты түрде табыстады. Көптен күткен қуанышқа 60 отбасы кенелді. Олардың қатарында көпбалалы отбасылар, әлеуметтік осал топ өкілдері және ата-анасының қамқорлығынсыз қалған жастар бар.
Жаңа тұрғын үй заманауи талаптарға сай салынған. Бір, екі және үш бөлмелі пәтерлер ыстық су жүйесімен, электр плиталармен жабдықталған, сондай-ақ орталықтандырылған газ жүйесіне қосылған.
«Халықты баспанамен қамтамасыз ету — біздің басты міндетіміз. Бұл — тұрғындарға тек баспана емес, жаңа өмір бастауға берілген мүмкіндік. Біз бұл бағыттағы жұмысты тоқтатпаймыз. Әр отбасы мемлекеттің қолдауын нақты сезінуі керек», — деді облыс әкімі Марат Сұлтанғазиев салтанатты рәсімде сөйлеген сөзінде.
Жаңа пәтерге ие болған отбасылардың бірі алты баланы тәрбиелеп отырған Көккөзовтер әулеті. Олар үш бөлмелі пәтерге ие болып, өмірлерінде жаңа кезеңнің басталғанын қуана жеткізді.
«Бұл күнді көп күттік. Өз баспанамыз болады деп ешқашан ойламадық. Енді шындыққа айналды. Бізге осындай қолдау көрсеткен барша азаматтарға алғысымыз шексіз», — дейді отағасының жұбайы Альбина Көккөзова.
2024 жылдың қорытындысы бойынша Алматы облысында 960 мың шаршы метр тұрғын үйді пайдалануға беру жоспарланып отыр. Бұл бағытта Ұйғыр ауданы да белсенді қатысып, тұрақты өсім көрсетіп келеді.
Өңірде жүзеге асып жатқан бұл жобалар — тек құрылыс саласының дамуы емес, сонымен қатар халықтың өмір сүру сапасын арттыруға, әлеуметтік тұрақтылықты қамтамасыз етуге бағытталған кешенді жұмыстың нәтижесі.
